По зачестените шпкулации меѓу кавадарчани за наводна неподготвеност за делување на кавадаречките пожарникари, тие синоќа беа ставени на тест. Во ненајавена посета им беа градоначалникот Александар Панов и претсдателот на Регионалната стопанска комора, Митко Јанчев.
Имено во 21.31 часот, од чуварската служба на фирмата „Мепос оператива“ од Кавадарци е пријавено дека во нивниот стопански двор се случил пожар.
Тричлената комисија го констатира пристигнувањето на првото противпожарно возило на кавадаречките пожарникари 9 минути по пријавувањето на пожарот, односно во 21:40 часот. Возилото пристигнало со 99% полн резервоар односно со 4 Т вода.
Второто возило на компанијата „Кожувчанка“ со 9 Т вода, на местото на пожарот пристинува за 15 минути од моментот на пријавувањето, додека третото возило од општинската ПП единица со 8 Т вода, е на самото место 21 минута по алармот за пожар.
Констатирано е дека во сите три возила се наоѓала посада на пожарникарите во полна опрема, подготвени за брза интервенција.
Резултатот од ненајавената проверка на подготвеноста на Против пожарната единица-Кавадарци е позитивен. Градоначалникот оцени дека после синоќнешната интервенција кај него биле отстранети сите сомнежи, дека противпожарната единица е неподготвена за интервенции при пожари – информираа од кабинетот на градоначалникот Панов.
Сличен став има и претседателот на регионалната стопанска комора Јанчев кој изрази задоволство од брзината и ефикасниот начин на интервенција на пожарникарите.
„После она што го покажаа екипите од Противпожарната единица Кавадарци, заедно со колегите од „Кожувчанка“, како и докажаната подготвеност на пожарникарите од „Фени Индустри“, разбирливо е зошто општината се наоѓа на врвот меѓу единиците на локалната самоуправа во Македонија каде е регистриран мал број на пожари, како и исклучително висок процент на брзо изгаснати пожари, благодарејќи на високата професионалност и одличното ниво на подготвеност на пожарникарите “ оцени Панов.
А.Д