Според најавите од Управата за хидрометеоролошки работи (УХМР), пред нас е период на сончево и исклучително топло време. Особено високи температури се очекуваат за време на викендот и во текот на следната работна седмица, кога дневните температури на повеќе места низ земјава ќе надминат 40 степени.
Поради најавениот топлотен бран и високиот УВ-индекс, се упатува апел до сите граѓани за максимално внимание и претпазливост, со цел заштита на личното здравје.
Клучни препораки и заштитни мерки:
- Избегнувајте движење на отворено: Во периодот од 11:00 до 17:00 часот да не се изложува директно на сонце и да се избегнуваат непотребни излегувања.
- Внимавајте на ранливите категории: Повозрасните лица, хронично болните, бремените жени и децата најмногу да се чуваат од директно сонце и да престојуваат во климатизирани или засенчени простории.
- Внесувајте доволно течности: Пијте поголема количина вода и освежителни пијалаци, а избегнувајте алкохол и пијалаци со голем процент на шеќер.
- Лесна храна и соодветна облека: Носете лесна, светла и комотна облека од природни материјали, заштитни очила за сонце и капа/шешир. Храната нека биде лесна, претежно овошје и зеленчук.
- Возилата под надзор: Не оставајте деца или миленици во паркирано возило, дури ни на неколку минути, бидејќи температурата во автомобилот може брзо да достигне смртоносно ниво.
- Пазете на сообраќајот и работата на отворено: Возачите да прават почести паузи при подолги патувања, а работодавачите да ги прилагодат работните обврски за работниците кои извршуваат физичка работа на отворено.