Општина Кавадарци, во соработка со Агенцијата за вработување на Република Северна Македонија, објави јавен повик за вклучување на невработени лица со ниски квалификации во проекти од инфраструктурен карактер за заштита на животната средина.
Јавниот повик е наменет за евидентираните невработени лица кои сакаат да се вклучат во Програмата за работно ангажирање – јавни работи. Ангажираните лица ќе бидат распоредени на следните активности во градот:
- Оплеменување на зеленилото и засадување нови садници
- Подигнување нови зелени површини низ градот
- Кастрење на вегетацијата
- Чистење и одржување на чистотата на повеќе локации
Услови, времетраење и надоместок
Работното ангажирање се реализира во еден циклус годишно, со времетраење од 30 работни дена, по четири часа дневно.
За време на ангажманот, на лицата им е обезбеден дневен надоместок во износ од 800 денари, во кој се вклучени данокот на личен доход и осигурувањето за инвалидност и телесно оштетување од повреда при работа. Важно е да се напомене дека на корисниците на парична помош, за времетраењето на работното ангажирање, ќе им биде активно правото на користење на паричната помош.
Потребни документи и рок за пријавување
Заинтересираните кандидати треба да ги достават следните документи:
- Пријава за учество
- Копија од лична карта
- Копија од трансакциона сметка
Документите се поднесуваат во Агенцијата за вработување – Кавадарци во периодот од 19.10.2026 до 26.10.2026 година, секој работен ден од 08:00 до 15:00 часот. По завршувањето на рокот, меѓу Општината, Агенцијата за вработување и избраните кандидати ќе се склучи соодветен договор за регулирање на правата и обврските.