Во општина Кавадарци утре наутро ќе се изврши трето авионско третирање против комарци за оваа сезона. Дезинсекцијата од воздух ќе се спроведе во вторник, на 1 септември 2026 година, во раните утрински часови, поточно во периодот од 05:30 до 07:00 часот.
Како што информираат од Општина Кавадарци, третманот ќе го изврши операторот ДВУ „РИМИН ЕР“ ДООЕЛ Штип, а со дезинсекцијата ќе биде опфатено подрачјето долж течението на реката Луда Мара – почнувајќи од селото Марена, преку целото градско подрачје на Кавадарци и селото Ваташа, па сè до браната Моклиште.
Од локалната самоуправа упатуваат посебен апел до пчеларите од овој регион да преземат соодветни мерки за заштита на своите пчелни семејства. Препораката е кошниците да бидат затворени за време на самото третирање, како и 3 до 4 часа по завршувањето на авионското прскање.
Доколку утре наутро настанат неповолни временски услови, како што се врнежи од дожд или силен ветар, дезинсекцијата ќе биде одложена, а граѓаните дополнително ќе бидат известени за новиот термин.