По повод Денот на ослободувањето на Кавадарци, Општина Кавадарци – Локална самоуправа го објави официјалниот Конкурс за доделување на престижната општинска Награда „7 Септември“ за 2026 година.
Наградата им се доделува на физички и правни лица како знак на општествено признание за истакнати остварувања во стопанството, науката, уметноста, културата, образованието, здравството, спортот, заштитата на животната средина и сите други области од животот кои даваат посебен придонес за развојот и афирмацијата на градот.
Исто така, признанието им се доделува и на ученици и студенти за посебен творечки труд или континуирани успеси во наставните и воннаставните активности.
Услови и начин на аплицирање:
- За што се доделува: За остварувања во изминатата година (до завршување на конкурсот) или за подолг изминат период кој претставува заокружена работна и творечка целина.
- Кој може да предложи: Право на предлагање кандидати имаат сите правни и физички лица.
- Што треба да содржи предлогот: Детално образложение, биографија за поединецот, како и полн назив, адреса и телефонски број на предлагачот. За печатени дела и изданија, задолжително се приложуваат 2 примероци од делото.
- Формулар: Потребниот формулар за конкурирање може да се подигне во Граѓанско-информативниот центар во Општина Кавадарци.
Предлозите се поднесуваат во два (2) примероци директно во Архивата на Локалната самоуправа Кавадарци (соба бр. 20) или преку пошта, адресирани до Комисијата за одбележување на празници и манифестации и доделување на награди и признанија при Советот на Општина Кавадарци.
Крајниот рок за доставување на иницијативите е најдоцна до 14 август 2026 година.