Пожарите на отворено можат да предизвикаат катастрофални штети врз природата, имотите и човечките животи, а најголемиот дел од нив настануваат поради човечко невнимание. Поради тоа, Територијалната противпожарна единица (ТППЕ) Кавадарци упатува апел за соодветно однесување и доследно почитување на превентивните мерки.
Пожарникарите потсетуваат на основните правила за заштита:
- Во природа: Строго да не се пали оган на отворено во сушни периоди, да не се фрлаат неизгаснати отпушоци од цигари и темелно да се изгасне секој затекнат оган пред да се напушти местото.
- При земјоделски активности: Забрането е палење стрништа и растителен отпад по жетвата, се препорачува механичко чистење на меѓите и редовна проверка на издувните системи на земјоделската механизација.
- Заштита на имотите: Околу куќите и викендиците во близина на шуми да се направи заштитен појас од најмалку 10 метри со расчистување на сувата трева и гранки, а ѓубрето во дворовите да не се гори.
Од ТППЕ Кавадарци ги повикуваат сите граѓани, доколку забележат дури и најмал чад или оган, веднаш да се јават на бесплатните броеви 193 (Пожарна) или 112 (Број за итни случаи).