Стопанско туристичката манифестација „Тиквешки гроздобер“ 2013 годинава по 32 пат ќе се одржи во Кавадарци во деновите од 13 до 15 септември во организација на градоначалникот и Советот на општината. Согласно програмата која Советот ја усвои на препоследната седница, во деновите на гроздоберските празнувања граѓаните на Кавадарци како и гостите и посетителите од Македонија и странство ќе имаат можност да проследат повеќе настани, изложб, концерти и настапи на познати домашни и балкански ѕвезди од забавната и фолк естрада.
Гроздоберот традиционално започнува во петок со отворање на изложба во Музеј-галерија Кавадрци. Годинава овој настан ќе се случи во новиот Музеј изграден на просторот на поранешниот младински дом каде во петок на 13 септември во 12.00 часот градоначалникот на Кавадарци Александар Панов ќе ја отвори Спомен собата на еден од најпознатите македонски етномузиколози Васил Хаџи-Манов, каде и ќе го објави почетокот на гроздоберските празнувања. Истиот ден на градскиот плоштад во 20 часот ќе се случи отворањето на „Винскиот Боемски фестивал“ каде ќе бидат сместени штандовите на винарниците. На централната бина на плоштадот ќе се одвива богата културно уметничка програма во рамките на „Вечерта на виното и песната“. На полноќ во еден од кавадаречките ресторани ќе се изврши избор на Винска Кралица и нејзиниот придружник винскиот крал. Во петок свои настапи ќе имаат: Тамара, Каролина Гочева и танчерската група „Хавана микс“ од Куба.
Во сабота на 14 септември на централната бина од 11.00 до 14.00 ќе настапат балетски групи, а на ул „Илинденска“ во БИД зоната од 10.00 до 15.00 ќе се одржи ревија на „Олд тајмери“. Централниот настан ќе започне во 20.00 часот со карневалското дефиле предводено од кралицата и кралот во кое ќе учествуваат карневалски поставки од Кавадарци, гости од Македонија и од збратимените градови. Забавната програма во сабота ќе ги донесе настапите на групата ДНК, мега ѕвездата Масимо Савиќ и на македонскиот супер стар Кирил Џајковски.
Програмата за недела започнува во 10.00 часот со настап на фолклорни групи и турнирот во Цајкова табла „Таблијада 2013“. Детскиот карневал започнува во 12.00 часот по што во 14.00 ќе биде откинат првиот грозд со што симболично ќе се означи масовната берба на винското грозје. За време на винскиот боемски фестивал ќе се изврши и дегустација на вина во 17.00 часот, а во 21.00 ќе бидат соопштени и најдобрите вина на годинашниот гроздобер. Вечерниот термин ќе го исполнат настапите на групата Синтезис по што ќе следува настапот на српската група Фрајле.
Додади коментар