Ангажираната оператива на фирмата „Цвет компани“ од Скопје деновиве привршува со изградбата на минор коритото на делницата долга 680 метри со поставување на обработен камен - информираат од локалната самоуправа.

 

 

Со изградбата на оваа делница ќе се спојат кејот-шеталиште Ваташа со делот во Кавадарци кај мостот „Слога“. Архитектонски и овој дел од кејот шеталиште ќе биде иста како во градот, односно со минор корито од камен, и шеталиште на двата брега од кои левото ќе биде со павер елементи, а десното од фин бетон.

 

 

 

Во завршната фаза ќе се постави урбана опрема и ново улично осветлување. Финансиската конструкција за овој проект изнесува 21.500.000 денари, парите се обезбедени преку Бирото за развој на Вардарскиот плански регион и буџетот на Општина Кавадарци.

Со реализацијата на петтата фаза од изградбата на кејот-шеталиште, општина Кавадарци ќе регулира три километри од коритото на реката Луда Мара на потегот од улицата „Страшо Пинџур“ кај мостот Ваташа до мостот „Белка“ кај Булеварот „Видое Смилевски“.