По бурните реакции на социјалните мрежи дека се загрозува градскиот парк во Кавадарци и зеленилото се узурпира за изградба на згради, побаравме став од локалната самоуправа. Градоначалникот Митко Јанчев со претставник на секторот за урбанизам ги стави на увид на јавноста генералниот и деталниот урбанистички план на општина Кавадарци.
Следејќи ја хронолошки процедурата на донесување на урбанистичките планови за оваа локација целата постапка започнала уште во 2003 година, а по неколку години планот е донесен во 2013 година.
„Деталниот урбанистички план „Дисанска“ е влезен во програма за изработка на урбанистички планови уште во 2007 година, врз основа на базичен документ од ГУП кој што е усвоен во 2003 година. Изработувач е „Перкан проект“ Прилеп, подизведувач „Интер инвест ин“ Кавадарци, ревидент на планот е „Зу ас“ Скопје. Во понатамошната постапка на планот имаме мислење од комисија во 2010 година утврдување на нацрт план 27.10.2010 година на совет. Па следи јавна анкета која траела од 11.11.2010 до 24.11.2010 каде јавноста може да има увид на планот која одела во три јавни гласила, иако законска обврска на општината е да оди во две гласила. Стигнале 6 анкетни листа, постапено е по нив. Презентацијата е одржана на 23.10.2010 година, каде биле присутни 21 лице и службите од општината. Добиени се позитивни мислења од јавни институции, од МЖСПП, Комуналец, Телеком, дирекција за заштита и спасување, Министерство за култура и ЕВН Кавадарци. Првото испраќање за согласност до Министерството за транспорт и врски е на 28.03.2011 година,. Согласноста е добиена на 30.09.2011 година, од МТВ, и на 30.10.2013 година е донесена одлука на советот за усвојување на планот. Како процедура, траела од 2007 до 2013 година“ образложи Цветанка Тодорова Лекоска од Секторот за урбанизам при општина Кавадарци.
Градоначалникот Митко Јанчев е дециден. Во неговиот мандат нема да се дозволи уништување на зелени површини, туку напротив, целото зеленило ќе биде во заштитена зона, а ќе се подигаат и нови зелени површини во градот.
„Овој ГУП и ДУП во делот на градбата кај споменикот на Ќиро Крстев и навлегувањето делумно во паркот е донесено во 2013 година. Јас како градоначалник, како општина и советот немаме можност да донесеме решение за укинување на ДУП или ГУП кога има издадено дозволи за градба. Инвестирано е во објекти и направена е инфраструктура. Инвестицијата тука воопшто не е занемарлива. Можеме како општина за во иднина на сите зелени површини да им ставиме граница, односно минимална граница и ја загарантираме таа граница. Како градоначалник стојам на располагање дека мора да се грижиме за зелените површини во делот на екологијата и во делот на самата градска средина, да добиеме почист воздух и средина. Се што имаме во понатамошен развој поготово во делот на градба, јавно и транспарентно ќе ги објавуваме до јавноста преку медиумите и ќе гледаме нашите служи да бидат поажурни, во она што значи да ги информираат граѓаните и да им укажат колкава е нивната можност за навремено да реагираат, кога се носат урбанистички планови. Кога во 2013 е донесен планот не реагирал никој. Процедурата траеле неколку години , а не реагирал никој. Донесена е одлука од сите министерства и релевантни институции. Ние сега после 5 години не можеме тоа да го ревидираме или да им правиме опструкција или нешто ново да донесеме“ рече градоначалникот Јанчев.
Тој додаде дека сите површини кои се околку градскиот парк не се на општината и на државата, туку дека таму има и парцели на приватни стопанственици, кои можеби и иницирале измена на урбанистичките планови, но никој не реагирал на измените.
„Со новиот ГУП кој ќе го донесеме, гарантирам дека во мојот мандат со советот нема да намалиме ни една зелена површина и доколку е стратешки интерес на било кој индивидуалец не доаѓа на памет да се направи такво нешто, но доколку е од интерес на урбаната заедница ќе го слушнеме прво гласот на народот“ рече Јанчев.
Првиот човек на општина Кавадарци ја нагласи и променетата одлука за изградба на зелен пазар позади зградите „Лепотици“, откако по спроведената анкета 67 семејства се изјасниле дека се против пазар во нивна близина. Тогаш, иако биле ископани стопи и порачани тезги за пазарот, општината одлучила по барање на жителите таму да се изгради парк.
„Како општина претрпевме штета, тезгите и проектот ги ставивме во мирување и одлучивме тоа да го направиме зелена површина. Со тоа покажавме дека не одиме само во интетрес на општуината, туку во интерес на граѓаните“ додаде Јанчев.
Како што беше појаснето на денешната средба со медиумите, согласно постојните урбанистички планови во блзиина на паркот е предвидена изградба уште на шест објекти за колективно домување, а и изградба на пет мали трговски објекти.
Градоначалникот најави дека новиот ГУП на општина Кавадарци се очекува да биде усвоен до крај на годината, а претходно, до средина на април истиот ќе биде ставен на јавна расправа. Во него е предвидено и ставање во функција или пренамена на објектите во новиот центар, котларата, пионерскиот дом.
Веќе подолг период кавадарчани на социјалните мрежи реагираат, како што велат, поради уништувањето на најубавиот парк во Македонија со изградба на згради. Тие побараа да се запре градежната експанзија, како не би се оштетиле „белите дробови“ на Кавадарци.
Од општината денеска уверија дека ниту еден сантиметар од паркот кој има површина од 10 хектари нема да биде „чепнат.
Ангел Данов
Додади коментар