Веќе неколку дена во Општина Велес организрано се собира хуманитарна помош за настраданото население од поплавите што деновиве ги зафатија Република Србија и Босна и Херцеговина. Волонтерите од Црвениот крст распоредени се на три собирни места во градот каде велешани имаат можност да ги донираат најпотребните продукти за поплавеното население.
Со цел за организирано дејствување и на бизнис заедницата од општината, Градоначалникот на Општина Велес, Славчо Чадиев и претседателот на Општинската организација на Црвениот крст, д-р Милчо Трајков, денес одржаа заедничка работна средба. Стопанствениците од општината масовно се одзваа на поканата и ги понудија своите ресурси за помош на настраданите. Беше договорен начинот на собирање и доставување на помошта од страна на правните субјекти. За таа цел веќе е ангажиран магацински простор во Спортската сала „Гемиџии“, која ќе биде отворена секој ден во периодот од 10,00 до 19,00 часот.
Додади коментар