Лозарите и овој гроздобер го минуваат во нервози. Интензивно го прибираат родот од лозовите површини, но се соочуваат со проблеми при продажбата. Последните обилни врнежи од дожд ја намалија шеќерноста кај грозјето.
Сега винариите не го почитуваат договореното, наместо да намалуваат од цената за грозјето кое има помалку шеќерност од 20 малигани, тие воопшто не го купувале таквото грозје, па лозарите не знаат што да му прават на набраното грозје. Едни велат ќе варат ракија, други пак сметаат дека винариите се мајтапат со нив.
„Не се почитува договореното. Визбите наместо да 
закинуваат по 0,68 денари за пониска шеќерна единица од 20, тие воопшто не го купувале грозјето. Ова е сериозен проблем. Го известивме инспекторатот и очекуваме со нивна помош работите да се средат и да се откупа грозјето како што се договоривме со визбите“ ни рече во телефонска изјава денеска лидерот на лозарите Љупчо Аризанов.
Производителите на грозје очекуваат државата да изврши притисок врз винариите и да го почитуваат договореното, како не би пропаднал родот. Искуството покажува дека секоја берба работите се исти. Едно се договара, а друго се случува при откупот.Лозарите велат дека мајтапот од визбите не се издржува, покрај што плаќаат цена која не ги покрива трошоците за производство, сега им прават проблем и со шеќерноста, само да го обезвреднат нивниот производ. Многу лозари кажуваат дека следната година немаат намера да трошат нерви и ќе ги напуштеле насадите.
Минатите години лозарите имаа проблем и со реалната тежина на грозјето им се крадеше на килограми. Го прашавме Аризанов како е годинава ситуацијата, дали реално цени тежината на грозје која ја носат лозарите во визбите.
„Има поплаки и за закинување на тежина, но засега не е докажано тоа. Се надевам дека визбите ќе бидат разумни и нема да ќарат дополнително од лозарската мака“ нагласува Аризанов.
Ангел Данов
ДРЖАВНИОТ ИНСПЕКТОРАТ НЕ КОНСТАТИРАЛ ПРЕКРШУВАЊЕ НА ДОГОВОРОТ - ИМАЛО СИТНИ НЕДОСЛЕДНОСТИ
Дражавниот инспекторат за земјоделство со свои инспектори постојано е присутен на терен додека се врши откуп на винско грозје, информираше денеска директорот на инспекторатот, Цветан Трифуновски. Тој ги посети откупувачите во кавадаречко и неготинско и во изјавата за медиумите изнесе констатација дека на терен биле регистрирани мали недостатоци, кои веднаш се отстранувале.
„Формиравме посебни тимови од инспектори кои што се практично присутни на секој откупен пункт. Значи еден инспектор има присутен на еден откупен пункт, постојано додека ќе трае откупот, се со цел да бидат отстранети и најмалите сомнежи за евентуална злоупотреба во делот на мерењето на шеќерноста и почитување на оние законски обврски кои што треба да ги почитуваат самите откупувачи, односно винарските визби за кои што се врши откупот“ рече Трифуновски.
Тој информира дека на сила се законските измени на законот за вино, а тоа значи враќање на стариот рок на исплата на винското грозје до 30 Април, со воведување на три подеднакви рати, крајот на Декември, 15 Февруари и 30 Април како последна рата со последните 40%. 20-40-40%
„Воведувањето и на другите измени кои што дозволуваат максимум 8% пониска цена за исплата веднаш, односно најдоцна до 7 дена. До 
сега ние пред да почне откупот согледавме неколку неправилности, кај неколку откупувачи, а против истите ќе бидат воведени санкции, ќе бидат издадени платни налози, а воедно ја користам оваа прилика да до сите откупувачи и винарски визби да ги почитуваат законските обрски се со цел да избегнеме евентуални санкции. Исто така ги охрабрувам и земјоделците да ги пријават сите неправилности кои што евентуално ќе ги воочат надвор од очите на инспекторатот, бидејќи само така во еден кооперантски однос ќе можеме да ставиме ред во самиот откуп. Знаете дека практично лозарите и винариите се договорија да бидат ланските цени 13 денари за Вранецот и 11 денари за белото грозје, со тоа што плаќањето ќе биде по шеќерни единици односно 0,68 дени за црното грозје во плус и минус зависно од малиганите кои што ги има, а за белото грозје 0,64 дени во плус и во минус“ рече Трифуновски.
Директорот на инспекторатот за земјоделство информира дека биле констатирани отстапки во делот на истакнување на цените, кои што се многу битни за земјоделците да знаат по која цена го продаваат својот род, имало отстапување во делот на баждарењето на мерните инструменти со кои што се мерат шеќерните едниници, во одреден дел во самата регистрација за дозвола за вршење на откуп согласно закон за земјоделство и рурален развој.
Лозарите велат дека дел од откупувачите не го почитуваат договореното со тоа што не ја менуваат цената за 0,68 денари, туку им го враќаат грозјето. Дали тоа го констатиравте и што со таквите случаи? На ова прашање директорот одговори дека такви проблеми при откупот немало. Останува нејасно дали лозарите сами си прават нервози или навистина откупувачите не се држат до договореното.
Ангел Данов
Додади коментар