Радосни беа денеска учениците од специјалната паралелка што работи во рамки на ООУ „Страшо Пинџур“ во Кавадарци. На гости им беа кошаркарите на КК„Фени индустри“. По повод претстојните новогодишни и божиќни празници тие им донесоа подароци, а учениците имаа можност да се дружат со кошаркарите, а подоцна и на спротските терени дел од учениците ги покажаа своите познавања од кошарката.

„По повод престојните новогодишни и божиќни празници, кошаркарите на Фени Индустри кои во средата со победата над МЗТ Скопје ја завршија натпреварувачката кампања за оваа календарска година, денес, на овој убав празничен ден, Свети Никола, иницираа посета на училиште за деца со посебни потреби од Кавадарци, кои патем се и наши верни поддржувачи на речиси сите натпревари.   Ова не е наша прва соработка со центарот, па откако веќе ги осознавме нивните реални проблеми и потреби, решивме наместо новогодишни пакетчиња да им подариме телевизор кој ќе го подобри и олесни дел од образовниот процес.  Задоволство ми е што и годинава сите кошаркари се вклучија и во целост ја поддржаа оваа активност, со што уште еднаш ја потврдија мисијата на клубот, но и на компанијата Фени Индустри за општествена одговорност.“ рече Надица Ставрова, одговорно лице за односи со јавноста при КК „Фени индустри“.

Благодарност за подароците искажа дефектологот Зоран Велков. Тој нагласи дека соработката со компанијата и со кошаркарскиот клуб е од поодамна.

„Веќе неколку години заедно го одбележуваме доаѓањето на Нова година. Еве и сега не израдуваа со подароци. Учениците радосни со кошаркарите на спортското игралиште покажуваат што знаат и умеат.“ рече Велков.

Ангел Данов

Додади коментар

▼