Одлуката за промена на општинскиот печат со новото уставно име на државата денеска предизвика кавга во кавадаречкиот совет. Советничката група на ВМРО-ДПМНЕ се изјасни дека ќе гласа против статутарната одлука за измени на статутот на општина Кавадарци со новото уставно име на државата.
На советникот Тони Нешковски по вака искажаниот став реплицираше Лазар Туриманџов од СДСМ. Нагласи дека со таквата ретроактивна политика на ВМРО-ДПМНЕ се кочел напредокот на државата.
„Имате директори на институции кои потпишуваат акти со името Република Северна Македонија, земате паушал од интитуција на РСМ. Откажете се од сето тоа, тогаш ќе верувам во тоа што го кажувате“ порача Туриманџов.
Нешковски реплицираше дека може за СДСМ државата да се вика РСМ, но не и за ВМРО-ДПМНЕ.
„Наскоро ќе има нова власт. Ќе се разгледува договорот од Преспа. Со распродавање на државата не одиме напред. Дадовме име, сега ќе ни ја земат историјата“ рече Нешковски.
Следуваше нова реплика од советникот Туриманџов. „Ако вие од ВМРО бевте патриоти немаше да ја опљачкате цела држава. За прв пат фондот за пензиско ипслати пензии без да земе кредит“ додаде Туриманџов.
Советникот Ташо Радњански на колегите од ВМРО-ДПМНЕ им рече декас е обидувале да дојдат до евтини политички поени. Побара да нема меѓусебни обвининувања на советниците, бидејќи уставното име на државата е Република Северна Македонија и ги праша советниците од ВМРО-ДПМНЕ дали биле против уставот на државата.
Во дискусијата се вклучи и советникот Зоран Јованчев. Тој праша дали ретроактивна не била политиката со откупот на праски, дали граѓаните и дале право на власта за промена на името. Според Јованчев во овие две години се случувало најголемото политичко насилство на политичката сцена.
По ваквите дискусии со образложение на одлуката која беше на дневен ред излезе градоначалникот Митко Јанчев, кој посочи дека одлуката се темели на законската обврска која е обврзувачка. Посочи дека му е криво што има подлеба на „наши“ и „ваши“.
„Како совет немаме никаква улога врз промената. Политчки поени е нормално да се собираат, но да не ги манипулираме граѓаните. Јас како градоначалник, додека ми трае мандатот, секогаш ќе го почитувам уставот и законските прописи. Морам да го употребувам уставното име Република Северна Македонија“ рече Јанчев.
Со 11 гласа „За“ и 8 против беше усвоена статураната одлука за изменување на статутот на општина Кавадарци, односново статутот Република Македонија се заменува со Република Северна Македонија, а истото се врши и на општинските печати.
На денешната 26та редовна седница советот разгледуваше и одлуки кои се однесуваат на работењето на ЈП Комуналец. Со 11 гласа „за“ и 7 „Воздржани“ се усвои одлуката за покачување на цената за износ на смет од 1,1 денар по м2 на 2 денари. Воздржани по оваа одлука беа дел од советниците на СДСМ.
Исто така се изврши и усогласување на цената на водата согласно одлуката на Регулаторната комисија.
Директорот на Комуналец, Ѓоко Попицов објасни дека покачувањето на цената за износ на смет е поради зголемениот обем на работа во сите сектори. Воведено е износ на смет и во сите рурални средини.
„Кавадарци има благодет, добива вода по гравитационен пад и затоа водата е најаевтина во цела држава. Велес и Охрид плаќаат над 20 денари за метар кубен. Но ние немаме потреба од драстично покачување на цената на водата“ рече градончалникот Јанчев и посочи дека цената за износ на смет мора да биде повисока со цел да се овозможи Комуналец соодветно да биде опремен за износ на смет и за процесот на селекција на отпад.
Јанчев најави и поставување на уште пет подземни контејнери во централното градско подрачје. Информира дека веќе се поставени низ градот 110 нови контејнери со различна боја на капаците за да може да се селектира отпадот, а следната година ќе бидат поставени уште 250.
На денешната седница едногалсно беше усвоена програмата за манифестацијата „Тиквешки гроздобер“, одлуките за примање донација од „Кожувчанка“ и „Пивара Скопје“. Советот донесе одлука за утврдување на работното време на вработените во детската градинка „Рада Поцева“ и одлука за зголемување на бројот на деца по воспитни групи за воспитната 2019/2020 година.
Ангел Данов
Додади коментар