Koвид одделот во кавадаречката болница речиси исполнет

Продолжува да расте бројот на хоспитализирани пациенти на ковид одделот во кавадаречката болница. Капацитетот од 23 болнички кревети е речиси исполнет, информираше денеска директорот на болницата, д-р Диме Коцев.

„Имаме хосипиталицирано вкупно 20 пациенти и уште три слободни места, но за брзо ќе се потполнат и тие, бидејќи имаме неколку пациенти на интерно одделение кои чекаат резултат за корона вирус, а ги имаат сите симптоми на вирусот. Еден пациент на 55 годишна возраст е транспортиран на инфективна клиника во Скопје, останатите хоспитализирани пациенти се со средно тешка клиничка слика“ рече д-р Коцев.

Тој повторно упати апел до сите граѓани да ги почитуваат максимално превентивните мерки.

А.Д