После подолг период, поради пандемијата со ковид 19 денеска кавадаречкиот совет заседаваше во општинската сала. Со физичко присуство на советниците се одржа 57 – та редовна седница.
Едногласно советот ги усвои измените и дополнувањата на статутот на општина Кавадарци и на програмата за уредување на градежно земјиште за 2021 година. Советот едногласно даде зелено светло и на измените и дополнувањата на одлуката за финансирање на проектот градски пазар со подземен паркинг. Градоначалникот Митко Јанчев ги информираше советниците за потребата од овие измени и за текот на изградба на пазарот. Тој нагласи дека е горд што во неговиот мандат и во мандатот на овој состав н а советот се работи на овој капитален проект, кој е од големо значење за општината и дека до крај на градежната сезона се очекувањата, да биде завршена изградбата.
На денешната седница се донесе и одлука за основање акционерско друштво „градски фудбалски клуб Тиквеш 1930. Јанчев нагласи дека со влезот во прва на лига на фудбалскиот клуб се наметна потреба од основање на акционерско друштво. Општината ќе има 51% удел во ова АД, а веќе се работи и на обезбедување на други акционери и спонзори на клубот. Градоначалникот рече дека се вршеле контакти со сите компании во општината. Минималниот буџет на АД ГФК Тиквеш ќе биде минимум 400.000 евра.
На денешната седница советот едногласно ја поддржа и одлуката за поставување на фото-напонски панели на десет јавни општински објекти со капацитет од 19,2 кв/ч.
Градоначалникот Јанчев информира дека овие фото напонски панели ќе се постават на основите и средни училишта, на општинската зграда и други општински објекти, со што ќе се обезбеди заштеда во сметките за струја и до 60%. Со оваа заштеда, нагласи Јанчев ќе може да се работи на нови реконструкции во училиштата и нивно опремување.
На денешната седница поминаа и измените и дополнувањата на одлуката за реконструкција на локален пат во селото Бохула. Градоначалникот елаборирајќи по овој проект посочи дека општината во континуитет одвојува пари од буџетот и за селските подрачја, како би се обезбедиле подобри услови за живот на тамошните жители, но и на луѓето кои градат викендици.
Советникот Ташо Радњански ја поздрави одлуката да се работи на реконструкција на патните правци во селата, но алармираше дека камионите на Македонски шуми кои превезуваат товар и над 40 тони ги оштетуваат општинските патишта. Беше донесен заклучок да се апелира сообраќајната полиција да врши почести патроли во тој дел од општината. Градоначалникот Јанчев рече дека најчесто тие патишта имаат капацитет да издржат товар до 12 тони, но многу често минуваат тешки товарни возила со многу поголем товар од дозволеното.
Советот донесе измени и на одлуката со која трговците имаа ослободување од надоместок за користење на просторот пред деловните простории за за вршење дејности и плаќаа 50% пониска комунална такса поради пандемијата. Сега со новата одлука се враќа на сила целиот надомест.
Беа усвоени годишни планови за вработување во ООУ „Тоде Хаџи Тефов“ и СОЗШУ „Ѓорче Петров“ и локален музеј галерија. Советот ја прифати донацијата од Слога пром за изработка на проектна документација за сообраќајница во близина на компанијата која се наоѓа на влезот во Кавадарци од Росоман. Градоначалникот даде појаснување за овој проект кој треба да ја зголеми безбедноста во сообраќајот.
Ангел Данов
Додади коментар