Најсовремени светилки со фотоволтаично напојување денеска се поставуваа на просторот позади зградите „Лепотици“. Општината го реализира проектот за конечно средување на овој простор, кој беше запуштен. По поставувањето на летниковец и детски играчки сега овој простор ќе биде осветлен и со улични светилки кои имаат напојување од сончевата енергија.

Поставени се 34 канделабри. Висината на столбовите е 4 метри. Се поставија светилки од 30 вати и фотоволтаични панели со акомулатори.

„ Oва  е на некој начин експеримент на локалната самоуправа уште еднаш да го испитаме домаќинлакот на одредени луѓе во градот и да видиме дали ваков тип на светилки,  кои се напојуваат со  електрична енергија може да се имплементираат во Кавадарци, бидејќи следен чекор ќе ни биде ова да го направиме во градскиот парк. Ова е дел од проектот за целосно оплеменување на овој простор. Во  изминатиот период овој простор беше запуштен, не служеше за ништо друго,  освен за гаражи или сметиште. Почнавме да му даваме некаква смисла. Останува уште мини пазарчето со 20 тезги и хортикултурното уредување. Се надевам дека ова ќе биде еден пријатен простор за рекреација и прошетка на повозрасните и за  најмладите. Тука е и малото игралиште за мал фудбал,  за оние што сакаат да спортуваат. Имаме до крајот предвидено и едно игралиште за кошарка. Мислам дека со тоа би ги исполниле сите барања кои беа искажани од жителите вооколните згради,  кои да потсетам беа против овде да се гради трговски центар“ рече градоначалникот Александар Панов  кој денеска беше во обиколка при монтирањето на светилките.

Проектот чини 1.719.732 денари, пари обезбедени од буџетот на општината по спроведена тендерска постапка.

 Сега на потег се граѓаните од овој дел. Тие треба да покажат поголема грижа кон софистицираните светилки и опремата која е поставена. Да се надеваме дека подолг период истите ќе се користат за намената која ја имаат и нема да бидат искршени или украдени.

Aнгел Данов

Додади коментар

▼