Полициските службеници од ОВР Кавадарци регистрираа повеќе инциденти во изминатото деноноќие, меѓу кои бегство од полицијата со нерегистрирано возило, закана со остар предмет во угостителски/продажен објект и измама за брза заработка на берза.
Бегство со „југо“ натоварено со дрва заврши со удар во полициско возило
На 04.11.2026 година во 15:50 часот во Кавадарци, полициски службеници забележале патничко возило „југо“ без регистарски таблички, натоварено со огревни дрва. Возилото го управувал Ѓ.К. (27), кој немал возачка дозвола, а сопатник бил А.В. (21), двајцата од Кавадарци. На знак за запирање од полицијата, тие ја зголемиле брзината, а по кратко време скокнале од возилото во движење и се дале во бегство.
Возилото без возач удрило директно во службеното полициско возило. При прегледот биле пронајдени огревни дрва без соодветна документација, кои се предадени на Шумската полиција, додека возилото е пренесено во депото на ЈП „Паркинг Кавадарци“. За настанот е известен јавен обвинител, а полицијата трага по лицата.
Закана со остар предмет во Црвени Брегови
Ноќеска, на 05.11.2026 во 03:11 часот во ОВР Кавадарци, 26-годишниот Ф.Ј. од Росоман пријавил дека во продажен објект во селото Црвени Брегови, неготинско, лицето М.Ф. му се заканувало со остар предмет, а потоа оштетило и дел од инвентарот во објектот. Остриот предмет е пронајден и одземен од страна на полицијата, а се преземаат мерки за целосно расчистување на случајот.
Млада жена измамена за 36.500 денари за „инвестирање на берза“
На 04.11.2026 во 13:40 часот, 24-годишна жена од кавадаречко село пријавила дека била измамена за сума од 36.500 денари. Според пријавеното, едно женско лице ја довело во заблуда со лажно ветување дека ќе ѝ помогне да инвестира на берза. Оштетената во неколку наврати ја уплатила сумата на пари, по што сфатила дека е жртва на измама. Полицијата презема мерки за расчистување и на овој случај.