Универзитетот „Гоце Делчев“ Штип денеска на прес конференција ги претстави плановите за упис на студенти во новата академска година. Има слободни 3870 места на 12 факултети и три академии, а очекувањата се и годинава да бидат запишани сличен број како лани, или околу 2000 студенти.
Проф. Д-р Дејан Мираковски, кој од септември ќе ја преземе функцијата ректор на овој универзитет, најави дека во функција е платформата за електронско аплицирање, а од оваа година за прв пат се воведува програма на англиски јазик на медицинскиот факултет.
Акредитирани програми на англиски јазик има и на правниот факултет и на музичката академија. Како што најави Мираковски и годинава ќе се стипендираат најдобро рангираните студенти кои ќе се запишат на студиската програма на македонски јазик.
Првиот уписен рок е на 25,26,29 и 30 август.
„Студентите веќе можат електронски да аплицираат преку електронската платформа на веб страната на УГД, а физички документите можат да ги достават по 10 август “ рече Мираковски.
A.Д