Општина Кавадарци продолжува со засилени вложувања во обновливи извори на енергија и енергетска ефикасност, утврдувајќи ја својата позиција како предводник меѓу општинските локални самоуправи во земјата.
Откако пред четири години беше првата општина во државата што инсталираше 200 kW фотонапонски панели на општинските објекти, денес овој проект добива значително проширување. Фотоволтаичните системи веќе се поставени на сите 12 предвидени јавни установи, со што вкупната инсталирана моќност достигна 355 kW, што директно ќе придонесе за значително намалување на сметките за струја и пренасочување на заштедените средства за други потреби на граѓаните.
Особено значаен сегмент од оваа инвестиција е поддршката од приватниот сектор. Фотоволтаичните модули се донација од компанијата „Пиксел гроуп“ во вредност од 4,5 милиони денари, што претставува директен влог со долгорочна корист за јавниот сектор и локалната заедница.
Новите фотоволтаични системи се поставени на следните локации:
- ЈЗУ Општа болница со проширена дејност – 71 kWp
- Детска градинка – Објект „Снежана“ – 50,02 kWp
- Детска градинка – Објект „Гроздоберче“ – 46,5 kWp
- Детска градинка – Објект „Детелинка“ – 25,83 kWp
- Детска градинка – Објект „Изворче“ – 25,3 kWp
- Детска градинка – Објект „Сонце“ – 25,3 kWp
- Основен суд Кавадарци – 24 kWp
- Локална самоуправа – 20,125 kWp
- ООУ „Димката Ангелов Габерот“ – 20 kWp
- Библиотека „Феткин“ – 16 kWp
- СОУ „Ќиро Спанџов Брко“ – 15,64 kWp
- Дом на култура „Иван Мазов Климе“ – 15,58 kWp
Покрај реализираните 12 објекти, во тек е и поставувањето на фотоволтаичен систем на зградата на Основното јавно обвинителство Кавадарци со моќност од 35 kW.
Од општината порачуваат дека преку користењето на сончевата енергија и намалувањето на тековните трошоци се отвора простор за нови инвестиции. Кавадарци продолжува со реализација на одржливи проекти кои носат долгорочна корист за сите жители денес и во иднина.