Александар Ристески од Прилеп кој живее во Кавадарци, денеска беше најсреќен меѓу дваесетината момчиња, кои скокнаа по светиот крст во водите на реката Луда Мара во Кавадарци.

Ристески редовно учествува на богојавленскиот водосвет од 2012 година и ова му е трет пат да го фати крстот. На сите верници им посака многу здравје и среќа, а на локалната самоуправа да продолжи со успешното работење како и до сега.

Најсреќниот, кој слави денеска и роденден, доби тв приемник oд локалната самоуправа,  златен привезок од златар „Перо“, и таблет од аптеки „Зегин“.

Заменик градоначалникот на Кавадарци, Никола Трендафилов им го честиташе денешниот голем христијански празник на сите верници.

На богојавленскиот водосвет претходеа литургии во црквите Свети Димитрија и Света Петка, а потоа верниците со литија слегоа на кејот на реката каде се изврши богојавленски водосвет и се потопи светиот крст во водите на реката Луда Мара.

Традиционално, богојавленски водосветкаде присуствуваа голем број верници од Тиквешијата се изврши и во водите на браната Моклиште. Осум момчиња скокнаа во ладните води на браната, а најсреќен прв да доплива до светиот крст беше 17 годишниот Љупче Бошев од селото Ваташа.

Од локалната самоуправа Кавадарци Бошев доби тв приемник , златен привезок.

„Посакувам многу здравје и среќа на сите граѓани. Среќен сум денеска“ рече Бошев.

РОСОМАН. ДЕМИР КАПИЈА, НЕГОТИНО, ГРАДСКО

Празникот Богојавление-Водици се прослави и во Росоман со богојавленски водосвет. Најсреќен беше Игор Атанасовски. Во Демир Капија од реката Бошавица светиот крст во извади 23 годишниот  Лазе Николовски.

Голем број  православни христијани од Неготино по повод празникот Богојавление - Водици присуствуваа и го следеа фрлањето на ритуалниот крст во водите на реката Вардар од Пепелишкиот мост. Годинава од 13 пријавени учесници во МПЦ Св. Атанасиј крстот го фати Тодор Пасев од градот Русе - Бугарија кој, како што самиот кажа, веќе 22 години по ред на разни локации се обидува да го фати крстот.

Пасев направи еден гест кој ги изненади сите и крстот го подари на општина Неготино врачувајќи му го на градоначалникот со желби за здравје и среќа на сите верници од општината.

Ангел Данов

Додади коментар

▼