Од утре во оптек полимерни банкноти од 10 и 50 денари

 

Полимерни банкноти во апосенска вредност од 10 и 50 денари од утре ќе бидат пуштени во промет, соопштуваат од Народна банка на Македонија.

 

Со ова Македонија станува една од државите чијашто централна банка има започнато процес на полимеризација на банкнотите на националната валута.

 

„Македонскиот денар ќе се вбројува меѓу валутите чии банкноти со пониска апоенска вредност, коишто се и најзастапени во одвивањето на готовинските трансакции, се изработени на најсовремен начин и од најсовремен материјал“, велат од Народната банка на Република Македонија.

 

Станува збор за банкноти кои не се оштетуваат лесно, што не е случај со хартијата, и кои имаат многу подолг век на траење. Овие банкноти се изработуваат од многу тенка, флексибилна пластична фолија која овозможува нивниот дизајн да содржи безбедносни карактеристики и заштитни знаци кои не може масовно да се репродуцираат со употреба на воспоставените техники за фалсификување банкноти.

 

Лабараторските тестови покажале дека полимерните банкноти се деформираат и топат на температура од 120 степени Целзиусови, што значи дека без оштетување ќе можат да преживеат во машините за перење.

 

Книжните банкноти од 10 и 50 денари повеќе нема да се користат како средство за плаќање, но во рок од една година можат да се заменат во банките за полимерни банкноти или ковани монети.

Додади коментар