МТСП: Директна помош за раст на платите до 18.000 денари во трудоинтензивните дејности

 

Денеска министерката за труд и социјална политика, Мила Царовска во општина Свети Николе ја презентираше новата мерка за финансиска поддршка за раст на платите во трудоинтензивните фирми за што од Буџетот се издвоени 360 милиони денари.

 

Преку оваа мерка државата ќе обезбеди директна финансиска поддршка од 30% од растот на бруто плата на работници, за исплата на повисоки плати до 18.000 денари. Мерката е наменета за фирми кај кои трошоците за вработени сочинуваат повеќе од 50% од вкупните трошоци и не прават високи профити, односно фирми кои имаат добивка како процент од вкупните расходи помала од 10%. Спред пресметките на МТСП околу 15.000 компании и 50.000 работници ги исполнуваат условите за користење на оваа мерка.

 

Пред претставниците од мали фирми од Свети Николе, Штип и Куманово, Царовска појасни дека со оваа мерка дополнително се поттикнува спиралата на севкупниот пораст на платите за работниците во Република Македонија.  Министерката посочи дека целта на овие владини мерки е да се овозможи раст на платите, како предуслов за поквалитетен животен стандард, но истовремено да се задржи кондицијата на фирмите и да се подобри продуктивноста на работниците.

 

 

Претседателот на Организација на работодавачи  Ангел Димитров, со присутните сподели дека покрај мерката која денеска се промовира,  важно е да се знае дека и активните мерки за вработување преку АВРМ  се подобрени во споредба со минатите години. Голема дополнителна форма на поддршка може да се добие и преку Фондот за иновации, кој финансира и до 70% од проектите и притоа обезбедува бесплатна консултација за подготовка на проекти.

 

Во рамки на посетата на Св. Николе, министерката Царовска ја посети и фабриката ,,Мода’’ каде со работниците разговараше за условите за работа - се вели во информацијата од одделението за односи со јавност при Министерството за труд и социјална политика.

    

 

Додади коментар